കൊല്ലം: ബസ് ജീവനക്കാരന്റെ പ്രണയാഭ്യര്‍ഥന നിരസിച്ച യുവതിക്ക് ഗുരുതരമായി കുത്തേറ്റു. ശരീരത്തില്‍ നിരവധി കുത്തേറ്റ യുവതിയെ തിരുവനന്തപുരം മെിക്കല്‍ കോളജില്‍ പ്രവേശിപ്പിച്ചു. കൊല്ലം ശാസ്താംകോട്ടയിലാണ് സംഭവം. പ്രണയം നിരസിച്ചതിന് പെണ്‍കുട്ടിയെ യുവാവ് വീട്ടില്‍ കയറി കുത്തുകയായിരുന്നു. യുവതിയുടെ നിലവിളി കേട്ട് മാതാപിതാക്കള്‍ എത്തിയപ്പോഴേയ്ക്കും യുവാവ് ഓടി രക്ഷപെട്ടു. ബസ് ജീവനക്കാരനായ ശാസ്താംകോട്ട സ്വദേശി അനന്തുവാണ് കുത്തിയത്. കൊല്ലം ശാസ്താംകോട്ടയില്‍ ഇന്ന് പുലര്‍ച്ചെ രണ്ടുമണിയോടുകൂടിയാണ് സംഭവം ആദ്യം ശാസ്താംകോട്ട താലൂക്ക് ആശുപത്രിയില്‍ എത്തിച്ച പെണ്‍കുട്ടിയെ പരിക്ക് ഗുരുതരമായതിനെ തുടര്‍ന്ന് തിരുവനന്തപുരം മെഡിക്കല്‍ കോളേജിലേക്ക് മാറ്റുകയായിരുന്നു. പെണ്‍കുട്ടിയെ അനന്തു ശല്യം ചെയ്തിരുന്നുവെന്നാണ് ബന്ധുക്കള്‍ പറയുന്നത്. പ്രണയാഭ്യര്‍ഥന നടത്തിയെങ്കിലും പെണ്‍കുട്ടി അത് നിരസിച്ചു. ഇതേതുടര്‍ന്നാണ് ഇയാള്‍ അക്രമം നടത്തിയതെന്നാണ് വിവരം. പൊലീസ് അന്വേഷണം ആരംഭിച്ചിട്ടുണ്ട്.
പ്രണയാഭ്യര്‍ഥന നിരസിച്ച യുവതിയെ ബസ് ജീവനക്കാരന്‍ കുത്തിപ്പരിക്കേല്പിച്ചു
