കൊച്ചി
എം.ടി വാസുദേവൻ നായരും വി എ ശ്രീകുമാറും തമ്മിലുളള രണ്ടാമൂഴം കേസ് ഒത്തുതീർപ്പിലേക്കെന്ന് റിപ്പോർട്ട്. തിരക്കഥ എം ടിക്ക് തിരികെ നൽകും. കഥയുടെയും തിരക്കഥയുടെയും പൂർണ അവകാശം എം ടിക്കായിരിക്കും. വി എ ശ്രീകുമാർ രണ്ടാമൂഴത്തെക്കുറിച്ച് സിനിമ ചെയ്യരുത്. എന്നാൽ മഹാഭാരതത്തെക്കുറിച്ച് സിനിമ ചെയ്യാം. പക്ഷേ, അതിലെ കേന്ദ്ര കഥാപാത്രം ഭീമൻ ആകരുത് . എം ടി അഡ്വാൻസ് തുകയായ 1.25 കോടി മടക്കി നൽകും. ഇതോടെ ജില്ലാ കോടതിയിലും സുപ്രീം കോടതിയിലുമുളള കേസുകൾ ഇരു കൂട്ടരും പിൻവലിക്കും.ഇവയാണ് ഒത്തുതീർപ്പുവ്യവസ്ഥകൾ എന്നാണ് അറിയുന്നത്.സുപ്രീം കോടതി തിങ്കളാഴ്ച കേസ് പരിഗണിക്കാനിരിക്കെയാണ് ഒത്തു തീ‍‌ർപ്പുണ്ടായത്. ഇക്കാര്യം ഇരു കൂട്ടരും സുപ്രീം കോടതിയെ അറിയിക്കും. ജസ്റ്റിസ് ചന്ദ്രചൂഡ് അദ്ധ്യക്ഷനായ ബെഞ്ചാണ് കേസ് പരിഗണിക്കാനിരുന്നത്.
മൂന്നു വർഷത്തിനുളളിൽ സിനിമ പൂർത്തിയാക്കുമെന്നായിരുന്നു കരാറെങ്കിലും കാലാവധി കഴിഞ്ഞിട്ടും സിനിമ യാഥാർത്ഥ്യമായില്ല. ഇതേ തുടർന്ന് വി എ ശ്രീകുമാർ രണ്ടാമൂഴം സിനിമയാക്കുന്നത് തടയണമെന്ന് ആവശ്യപ്പെട്ട് എം ടി കോടതിയെ സമീപിക്കുകയായിരുന്നു.
