കൊച്ചി: പൃഥ്വിരാജ്,നസ്രിയ,പാര്‍വതി എന്നിവരെ മുഖ്യ കഥാപാത്രങ്ങളാക്കി അഞ്ജലി മേനോന്‍ ഒരുക്കുന്ന ചിത്രത്തിന്റെ റിലീസ് തീയ്യതി പ്രഖ്യാപിച്ചു. വിവാഹ ശേഷം നസ്രിയ തിരിച്ചുവരുന്ന ചിത്രമെന്ന നിലയില്‍ വാര്‍ത്താ പ്രാധാന്യം നടിയ ചിത്രം ജൂലൈ ആറാം തീയതി തീയേറ്ററുകളിലെത്തുമെന്നാണ് റിപ്പോര്‍ട്ടുകള്‍. രജപുത്ര റിലീസാണ് ചിത്രം തിയറ്ററുകളിലേക്ക് എത്തിക്കുന്നത്.
ചിത്രത്തിലെ നസ്രിയയുടെയും പൃഥ്വിരാജിന്റെയും ലുക്ക് നേരത്തെ പുറത്തായിരുന്നു. പോസ്റ്റ് പ്രൊഡക്ഷന്‍ സ്റ്റേജിലാണ് ചിത്രം ഇപ്പോള്‍. ഉസ്താദ് ഹോട്ടലിനും ബാംഗ്ലൂര്‍ ഡെയ്‌സിനും ശേഷം അഞ്ജലി ഒരുക്കുന്ന ചിത്രമാണ് ഇത്. ചിത്രത്തിന്റെ പേര് ഇതുവരെ പുറത്തു വിട്ടിരിക്കുന്നത്. തന്റെ മുന്‍ ചിത്രങ്ങള്‍ എന്ന പോലെ ഈ ചിത്രവും വ്യക്തികള്‍ തമ്മിലുള്ള ആത്മബന്ധം സൂചിപ്പിക്കുന്ന സിനിമ ആയിരിക്കുമെന്ന് അഞ്ജലി മേനോന്‍ പറഞ്ഞിരുന്നു.
ചിത്രത്തിലെ പൃഥ്വിയുടെ കഥാപാത്രം വളരെ ശ്രദ്ധേയമാണെന്നും കാമുകനായും സഹോദരനായും ആ കഥാപാത്രം തീവ്രമായ അനുഭവങ്ങളിലൂടെ കടന്ന് പോകുന്നുവെന്നും നിര്‍മാതാവ് എം രഞ്ജിത്തും അഭിപ്രായപ്പെട്ടിരുന്നു.
