ഫേസ്ബുക്ക് ലൈവിനിടയിൽ തിരുവനന്തപുരത്തുള്ള തന്‍റെ കട്ടൗട്ടിനെകുറിച്ച് ചോദിച്ചയാളാട് ആ സത്യം വെളിപ്പെടുത്തി നടൻ ബൈജു. ബൈജു ചേട്ടന്റെ വലിയ കട്ടൗട്ട് ഒക്കെ വച്ചിട്ടുണ്ടല്ലോ തിരുവനന്തപുരത്ത് എന്നായിരുന്നു ലൈവിനിടയിൽ ഒരാള്‍ ചോദിച്ചത്. അപ്പോള്‍ തന്നെ ഉരുളക്ക് ഉപ്പേരി പോലെ ബൈജു പറഞ്ഞ മറുപടി ഇങ്ങനെയായിരുന്നു: ”അത് ഞാന്‍ കാശ് മുടക്കി വച്ചതാണ്, 15000 രൂപയാണ് ഒരെണ്ണത്തിന്‌”.
വര്‍ഷങ്ങളായി സിനിമയില്‍ ചെറുതും വലുതുമായ ഒട്ടനവധി വേഷങ്ങള്‍ ചെയ്ത് പ്രേക്ഷകരുടെ പ്രിയപ്പെട്ടവന്‍ ആയി മാറിയ നടനാണ് ബൈജു. തിരുവനന്തപുരം ഭാഷ ഏറെ വ്യക്തമായി പറയുന്ന നടന്മാര്‍ ബൈജുവിനെപ്പോലെ വളരെ കുറവാണ് താനും. മോഹന്‍ലാലിന്‍റെ ലൂസിഫര്‍ എന്ന ചിത്രത്തിലെ ബൈജുവിന്‍റെ വേഷം ഏറെ ശ്രദ്ധിക്കപ്പെട്ടിരുന്നു. ഇപ്പോള്‍ നാദിര്‍ഷ ഒരുക്കുന്ന ”മേരാ നാം ഷാജി” എന്ന ചിത്രത്തില്‍ തിരുവനന്തപുരത്തുകാരനായ ഷാജിയായാണ് ബൈജു എത്തുന്നത്.
തിരുവനന്തപുരത്ത് സിനിമയുടെ റിലീസിനോട് അനുബന്ധിച്ച്‌ ബൈജുവിന്‍റെ വലിയ കട്ടൗട്ട് വച്ചിട്ടുണ്ട്. അതിനെക്കുറിച്ച്‌ ഇന്നലെ എത്തിയ ഫെയ്‌സ്ബുക്ക് ലൈവില്‍ സംവിധായകൻ നാദിര്‍ഷയോടൊപ്പം ബൈജു നൽകിയ രസകരമായ മറുപടിയുടെ വീഡിയോ വൈറലാകുകയാണ്. ജീവിതത്തിൽ അഭിനയിക്കാൻ അറിയാത്ത ഒരേയൊരു നടനാണ് താനെന്ന് ബൈജു ഒരിക്കൽ കൂടി തെളിയിച്ചിരിക്കുകയാണ്.
