കളി തുടങ്ങി 13ാം മിനുട്ടില്‍ തന്നെ ഫ്രാന്‍സ് മുന്നിലെത്തി. സ്വന്തം ബോക്‌സില്‍ നിന്ന് പന്തുമായി കുതിച്ച കെയ്‌ലിയന്‍ എംബാപ്പെയെ ബോക്‌സില്‍ വച്ച് മാര്‍ക്കസ് റോജ വീഴ്ത്തിയതിന് ലഭിച്ച പെനാല്‍റ്റി വലയിലാക്കിയാണ് ഫ്രാന്‍സ് മുന്നിലെത്തിയത്. കിക്കെടുത്ത അന്റോയിന്‍ ഗ്രിസ്മാന്‍ ഒരു പഴുതും അനുവദിക്കാതെ പന്ത് വലയിലാക്കി ഫ്രഞ്ച് പടയെ മുന്നിലെത്തിക്കുകയായിരുന്നു. എന്നാല്‍ ആദ്യ പകുതിക്ക് പിരിയും മുന്‍പ് തന്നെ അര്‍ജന്റീന ഗോള്‍ മടക്കി. 41ാം മിനുട്ടില്‍ എയ്ഞ്ചല്‍ ഡി മരിയ നേടിയ സുന്ദരന്‍ ലോങ് റെയ്ഞ്ച് ഷോട്ടാണ് അര്‍ജന്റീനയ്ക്ക് സമനിലയൊരുക്കിയത്. എവര്‍ ബനേഗ കൈമാറിയ പന്താണ് മികച്ച ഷോട്ടിലൂടെ മരിയ വലയിലാക്കിയത്.
രണ്ടാം പകുതിയുടെ തുടക്കത്തില്‍ തന്നെ അര്‍ജന്റീന ലീഡെടുത്തു. 48ാം മിനുട്ടില്‍ ലയണല്‍ മെസിയുടെ ശ്രമമാണ് ഗോളില്‍ കലാശിച്ചത്. പാകത്തില്‍ കിട്ടിയ പന്ത് വല ലക്ഷ്യമാക്കി മെസ്സി തൊടുത്തു. തൊട്ടുമുന്നിലുണ്ടായിരുന്ന ഗബ്രിയേല്‍ മെര്‍ക്കാഡോ പന്ത് സുരക്ഷിതമായി വലയിലാക്കി.
57ാം മിനുട്ടില്‍ ബെഞ്ചമിന്‍ പവര്‍ഡ് ഫ്രാന്‍സിനെ ഒപ്പമെത്തിച്ചു. പിന്നീടാണ് നാല് മിനുട്ടിനിടെ രണ്ട് സുന്ദരന്‍ ഗോളുകള്‍ വലയിലാക്കിയുള്ള എംബാപ്പെയുടെ മാന്ത്രികത. കളിയുടെ 64, 68 മിനുട്ടുകളിലാണ് ഫ്രഞ്ച് യുവ താരത്തിന്റെ മിന്നല്‍ ഗോളുകളുടെ പിറവി. അവസാന ഘട്ടത്തില്‍ സെര്‍ജിയോ അഗ്യെറോയിലൂടെ മൂന്നാം ഗോള്‍ നേടാന്‍ അര്‍ജന്റീനയ്ക്ക് സാധിച്ചെങ്കിലും അത് നേരിയ ആശ്വാസം മാത്രമായിരുന്നു.
