വിഴിഞ്ഞത്ത് മത്സ്യത്തൊഴിലാളികള് നടത്തുന്ന സമരത്തില് സംഘര്ഷം. തുറമുഖ കവാടം ഉപരോധിച്ചുള്ള സമരം നാലാം ദിവസവും ശക്തമായി തുടരുകയാണ്. ബാരിക്കേഡ് മറികടന്ന് അതീവ സുരക്ഷാ മേഖലയില് കടന്ന സമരക്കാര് തുറമുഖ നിര്മാണ മേഖലയില് പ്രവേശിക്കുകയും, അദാനി ഗ്രൂപ്പിന്റെ ഓഫീസില് കൊടി നാട്ടുകയും ചെയ്തു. സര്ക്കാര് ഇന്ന് ചര്ച്ച നടത്താനിരിക്കെയാണ് മത്സ്യത്തൊഴിലാളികള് സമരം ശക്തമാക്കിയത്.
പള്ളം ലൂര്ദ്പുരം, അടിമലത്തുറ, കൊച്ചു പള്ളി എന്നിവിടങ്ങളില് നിന്നുള്ള മത്സ്യത്തൊഴിലാളികളാണ് ഇന്ന് ഉപരോധസമരത്തിന് നേതൃത്വം നല്കിയത്. സ്ത്രീകള് അടക്കമുള്ള പ്രതിഷേധക്കാര് പൊലീസ് ബാരിക്കേഡ് മറിച്ചിട്ട് തുറമുഖത്തേക്കു മാര്ച്ച് നടത്തുകയായിരുന്നു. തുറമുഖ നിര്മ്മാണം നിര്ത്തിവെക്കണമെന്നതടക്കമുള്ള തങ്ങളുടെ ആവശ്യങ്ങളില് നിന്നും പിന്നോട്ട് പോകില്ലെന്ന് സമരക്കാര് ആവര്ത്തിച്ചു.
പൊലീസിനെതിരെയും സമരക്കാര് മുദ്രാവാക്യം വിളിച്ചു. എന്നാല് സംയമന നിലപാടാണ് പൊലീസ് സ്വീകരിച്ചത്. സമരം നേരിടാന് പ്രദേശത്ത് വന് പൊലീസ് സന്നാഹത്തെയാണ് വിന്യസിച്ചിട്ടുള്ളത്. തുറമുഖം നിര്ത്തി വെച്ച് ആഘാത പഠനം നടത്തുന്നത് ഉള്പ്പെടെയുള്ള ഏഴിന ആവശ്യങ്ങളും അംഗീകരിക്കാതെ പിന്നോട്ടില്ലെന്നാണ് സമരത്തിന് നേതൃത്വം നല്കുന്ന തിരുവനന്തപുരം ലത്തീന് അതിരൂപതയുടെ നിലപാട്.