പ്രതികരണവുമായി കോൺഗ്രസിനെ ചിലർ ചേർന്ന് വീണ്ടും ഐ.സി.യുവിലാക്കാൻ ശ്രമിക്കുകയാണെന്ന് കെ. മുരളീധരൻ. പാർട്ടി പുന:സംഘടനയിൽ പ്രതികരിക്കുകയായിരുന്നു അദ്ദേഹം. സ്ഥാനമാനങ്ങൾ വീതം വെക്കുകയാണെന്നും അദ്ദേഹം പറഞ്ഞു. ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം. ഐ.സി.യുവിലായിരുന്ന കോൺഗ്രസിനെ പൂർണ ആരോഗ്യത്തോടെയാണ് തൃക്കാക്കരയിലെത്തിച്ചത്. അത് പിന്നേയും ഐ.സി.യുവിലേക്ക് തന്നെ മാറ്റാനുള്ള ശ്രമങ്ങളാണ് ചില ഭാഗത്തു നിന്നും കാണുന്നതെന്നും മുരളീധരൻ പറഞ്ഞു.
‘കഴിഞ്ഞ നിയമസഭാ ലോക്കൽ ബോഡി തെരഞ്ഞെടുപ്പുകളിലെ പരാജയത്തിൽ ഐ.സി.യുവിൽ ആയ പ്രസ്ഥാനത്തെ പൂർണ്ണ ആരോഗ്യത്തോടെ തൃക്കാക്കരയിൽ നമ്മൾ തിരികെ കൊണ്ടുവന്നിരുന്നു.
ഐക്യതയോടെയുള്ള കൂട്ടായ പ്രവർത്തനത്തിന്റെ വലിയ വിജയമായിരുന്നു അത്. എന്നാൽ സ്ഥാനമാനങ്ങൾ വീതം വെച്ച് അതിനെ ഐ.സി.യുവിലേക്ക് തിരികെ അയക്കാനുള്ള ശ്രമങ്ങൾ ചില ഭാഗത്തുനിന്നും കാണുന്നതിൽ അതിയായ ദുഃഖമുണ്ട്,’ അദ്ദേഹം ഫേസ്ബുക്കിൽ കുറിച്ചു. 25 ശതമാനം പുതിയ ആളുകളെ ഉൾപ്പെടുത്തിയുള്ള പട്ടികയാണ് കോൺഗ്രസ് തയ്യാറാക്കുന്നത്.
28 പുതുമുഖങ്ങളെ ഉൾപെടുത്താൻ ആണ് ധാരണയായത്. കെ.പി.സി.സി പ്രസിഡന്റ് കെ. സുധാകരൻ, പ്രതിപക്ഷ നേതാവ് വി.ഡി. സതീശൻ, മുതിർന്ന നേതാക്കളായ ഉമ്മൻ ചാണ്ടി, രമേശ് ചെന്നിത്തല എന്നിവർ യോഗം ചേർന്നാണ് പട്ടിക സംബന്ധിച്ച് ധാരണയിലെത്തിയത്.
280 അംഗപട്ടികയിൽ 46 പേരെ മാറ്റിക്കൊണ്ടുള്ള പട്ടിക നേരത്തെ സമർപ്പിച്ചെങ്കിലും യുവ, വനിത പ്രാതിനിധ്യം കൂട്ടാൻ ആവശ്യപ്പെട്ട് പട്ടിക തിരിച്ചയച്ചിരുന്നു. ഇതിനെ തുടർന്നാണ് മാറ്റം വരുത്തിയത്.