ന്യൂഡല്‍ഹി
മഹിളാ കോണ്‍ഗ്രസ് അദ്ധ്യക്ഷ സുഷ് മിത ദേവ് കഴിഞ്ഞ ദിവസം പാര്‍ട്ടി വിട്ടതിന് പിന്നാലെ നെറ്റ ഡിസൂസയെ മഹിള കോണ്‍ഗ്രസിന്‍റെ ആക്ടിങ് പ്രസിഡന്‍റായി കോണ്‍ഗ്രസ് ദേശീയ അദ്ധ്യക്ഷ സോണിയ ഗാന്ധി നിയമിച്ചു. മുഴുവന്‍ സമയ അദ്ധ്യക്ഷയെ നിയമിക്കുന്നത് വരെ മഹിള കോണ്‍ഗ്രസിന്‍റെ ചുമതല ഡിസൂസയെ ഏല്‍പിച്ച വിവരം കോണ്‍ഗ്രസ് ജനറല്‍ സെക്രട്ടറി കെ.സി. വേണുഗോപാലാണ് വ്യക്തമാക്കിയത് .ജാർക്കൻഡിൽ നിന്നുള്ള കോൺഗ്രസ് നേതാവാണ് നെറ്റ ഡിസൂസ.
അസമിലെ പ്രമുഖ നേതാവും മുന്‍ എം.പിയുമായിരുന്ന സുസ്മിത കഴിഞ്ഞ ദിവസം കോണ്‍ഗ്രസ് വിട്ട് തൃണമൂല്‍ കോണ്‍ഗ്രസില്‍ അംഗത്വം സ്വീകരിച്ചിരുന്നു . സുസ്മിത ദേവ് അസമില്‍ തൃണമൂലിനെ നയിച്ചേക്കുമെന്നാണ് വിവരം. പൗരത്വ പ്രക്ഷോഭ നേതാവും എം.എല്‍.എയുമായ അഖില്‍ ഗൊഗോയ് പാര്‍ട്ടി നേതൃ സ്ഥാനം നിരസിച്ചതോടെയാണ് സുസ്മിതക്ക് അവസരം ലഭിക്കുകയെന്നാണ് വിവരം.
തിങ്കളാഴ്ച രാവിലെയാണ് സുസ്മിത ദേവ് കോണ്‍ഗ്രസ് വിട്ടത്. രാജിക്കത്ത് പാര്‍ട്ടി അധ്യക്ഷ സോണിയ ഗാന്ധിക്ക് കൈമാറുകയും ചെയ്തു. 48കാരിയായ സുസ്മിത പ്രമുഖ കോണ്‍ഗ്രസ് നേതാവ് സന്തോഷ് മോഹന്‍ ദേവിെന്‍റ മകളാണ്.
