ഓസ്‌ട്രേലിയൻ ഓപ്പൺ പുരുഷ സിംഗിൾസ് കിരീടം സ്‌പാനിഷ്‌ താരം റാഫേൽ നദാലിന്. ഫൈനലിൽ റഷ്യയുടെ ഡാനിൽ മെദ്‌വദേവിനെ തോൽപ്പിച്ചാണ് റാഫേല്‍ നദാൽ ചരിത്ര നേട്ടം കൈവരിച്ചത്. ഇതോടെ ഏറ്റവും കൂടുതല്‍ ഗ്രാന്‍ഡ്സ്ലാം കിരീടങ്ങളെന്ന നേട്ടം നദാലിന്റെ അക്കൗണ്ടിലായി. അഞ്ച് സെറ്റ് നീണ്ട കടുത്ത പോരാട്ടത്തോനൊടുവിലാണ് റാഫേൽ നദാൽ നേട്ടം കരസ്ഥമാക്കിയത്. 20 ഗ്രാന്‍ഡ്സ്ലാം വീതം നേടിയ റോജര്‍ ഫെഡറര്‍, നൊവാക് ജോക്കോവിച്ച് എന്നിവരെയാണ് നദാല്‍ മറികടന്നത്.
ഫൈനലില്‍ റഷ്യയുടെ ഡാനില്‍ മെദ്‌വദെവിനെ കടുത്ത പോരാട്ടത്തില്‍ വീഴ്ത്തിയാണ് റാഫ ആധുനിക ടെന്നീസിന്റെ വരാന്തയില്‍ പുതിയ സിംഹാസനം വലിച്ചിട്ട് ഇരിപ്പുറപ്പിച്ചത്. ആദ്യ രണ്ട് സെറ്റുകള്‍ നേടി മെദ്‌വദെവ് ആധിപത്യം ഉറപ്പിച്ചെങ്കിലും പിന്നീടുള്ള മൂന്ന് സെറ്റുകള്‍ തിരിച്ചുപിടിച്ച് അവിശ്വസനീയ മുന്നേറ്റത്തോടെയാണ് റാഫയുടെ കിരീടധാരണം. സ്‌കോര്‍: 2-6, 6-7 (5-7), 6-4, 6-4, 7-5.
കരിയറില്‍ എന്നും തിരിഞ്ഞു നിന്നിട്ടുള്ള വേദിയാണ് റാഫയ്ക്ക് ഓസ്‌ട്രേലിയന്‍ ഓപ്പണ്‍ വേദി. 2009ല്‍ ഓരേയൊരു തവണയാണ് ഇവിടെ നദാല്‍ കിരീടം ഉയര്‍ത്തിയിട്ടുള്ളത്. 13 വര്‍ഷങ്ങള്‍ക്കിപ്പുറം ചരിത്ര നേട്ടത്തോടെ രണ്ടാം ഓസ്‌ട്രേലിയന്‍ ഓപ്പണ്‍ കിരീട നേട്ടമാണ് താരം സ്വന്തമാക്കിയത്.
13 ഫ്രഞ്ച് ഓപ്പണ്‍ കിരീടങ്ങള്‍, നാല് യുഎസ് ഓപ്പണ്‍, രണ്ട് വിംബിള്‍ഡണ്‍, രണ്ട് ഓസ്‌ട്രേലിയന്‍ ഓപ്പണ്‍ കിരീടങ്ങളോടെയാണ് 21 ഗ്രാന്‍ഡ് സ്ലാമുകളെന്ന അപൂര്‍വ നേട്ടത്തിലേക്ക് റാഫ ഓടിക്കയറിയത്. റോജർ ഫെ‍ഡറർ പങ്കെടുക്കാത്തതും ജോക്കോവിച് വിസ പ്രശ്നങ്ങളെ തുടർന്ന് മടങ്ങിയതും റാഫേൽ നദാലിന്റെ വഴി കൂടുതൽ എളുപ്പമാക്കുകയും ചെയ്തു.
