തൃക്കാക്കര ഉപതെരഞ്ഞെടുപ്പിൽ ട്വൻറി ട്വൻറി വോട്ട് ആർക്കെന്ന് ഉടൻ പ്രഖ്യാപിക്കുമെന്ന് ചീഫ് കോർഡിനേറ്റർ സാബു എം. ജേക്കബ്. ട്വൻറി ട്വൻറിയുടെ വോട്ട് ചോദിക്കും മുൻപ് ട്വൻറി ട്വൻറിക്കെതിരെ നടത്തിയ അക്രമങ്ങളിൽ മാപ്പുപറയാൻ പി.വി ശ്രീനിജൻ എം.എൽ.എ അടക്കമുള്ളവർ തയ്യാറാകണമെന്നും സാബു പറഞ്ഞു. അതേസമയം കിറ്റക്‌സ് സ്ഥാപനങ്ങളിൽ റെയ്ഡ് നടത്തി എന്ത് നിയമവിരുദ്ധ പ്രവർത്തനങ്ങൾ കണ്ടെത്തിയെന്ന് സർക്കാർ വ്യക്തമാക്കണമെന്നും സാബു എം. ജേക്കബ് പറഞ്ഞു.
ശ്രീനിജിൻ അടക്കമുള്ളവരെ നിലയ്ക്കുനിർത്താൻ പാർട്ടി തയ്യാറാകണം. രണ്ടാം പിണറായി സർക്കാരിൻറെ വിലയിരുത്തലാകും ഉപതെരഞ്ഞെടുപ്പ്. സിൽവർ ലൈനും അക്രമ രാഷ്ട്രീയവും അടക്കമുള്ള വിഷയങ്ങൾ പരിഗണിച്ചായിരിക്കും നിലപാട് സ്വീകരിക്കുക. സിൽവർ ലൈൻ സാമ്പത്തികമായി നഷ്ടമുണ്ടാക്കുന്ന പദ്ധതിയാണ്. ജനക്ഷേമ സഖ്യത്തിൻറെ നേതൃസ്ഥാനം സംബന്ധിച്ച് തർക്കങ്ങൾ ഇല്ല.സംസ്ഥാനത്തെ 140 മണ്ഡലങ്ങളിലും ജനക്ഷേമ സഖ്യം പ്രവർത്തിക്കുമെന്നും സാബു പറഞ്ഞു.
